Lara & Hendré | 6 Maart 2010 | La Colline, Port Elizabeth

Ek weet nie eers waar om te begin nie…hierdie was een van my lekkerste troues nóg! Vrydag 5 Maart het ek en Kappie PE toe gevlieg en toe ontmoet ek sommer vir Lara & Hendré die aand vir die eerste keer daar op die lughawe. Ek het dadelik geweet dat hierdie troue asemrowend en baie opwindend gaan wees. Die Saterdag was dit toe ons en die GPS (wat ‘n wonderlike uitvindsel!)…aangesien ek P.E van geen kant af ken nie! Eers het ons gestop by La Colline om die dekor af te neem – ek was gek oor die vintage kombinasie van roomkleurige en sagte pers rose, kant, kristalle en die wit sjokolade koek (mmm..). Ek was uit my nate toe ek aankom by die gastehuis waar Lara reggemaak het! Dit was die een visuele fees op die volgende…die lig was perfek vir foto’s – sag en romanties en Lara se rromantiese, eenskouer rok het soos n handskoen gepas aan die fyn meisietjie met die helder blou oë en sagte blonde hare. Marietjie Hurter (Lara se ma se tweeling sussie) het soos gewoonlik getoor met haar grimeer kwassies. Die gastehuis het die perfekte palet gebied vir Lara se kleurskema en vintage tema. Die volgende stop was die klip katedraaltjie in Sentraal PE – ek is mal oor ‘n ou klip kerkie soos hierdie, dit het net dadelik soveel karakter! Lara het ook in styl gearriveer in ‘n ou kar wat later briljant gewerk het teen die helder kleurige huisies (wat so baie herinner aan een van my gunstelinge plekke in die Kaap – die Bo Kaap). Daar is darem min dinge so treffend in ‘n foto as vrolike kleure saam met ‘n vrolike, treffende paartjie. Lara en Hendré is sulke gemaklike, spontane mense en hulle het die fotosessie so baie geniet dat ek nie wou ophou fotos neem nie! Ek het later vir Kappie gesê dat dit nie eers vir een oomblik uitputtend was nie omdat hulle so baie van hulle eie energie in die foto’s gesit het – ‘n resep wat nie kan misluk nie! Ons het die helder mure van Sentraal PE (die plek leef en beef van ou huisies, interessante winkeltjies, teksture en ongelooflike argitektuur – ek is so bly ek kon dit eerstehands beleef!) toe verruil vir die agtergrond van sagte grys lug, roomkleurige duine en grys-blou water by Sardinia Baai. Van hier af was dit toe terug La Colline toe vir ‘n onvergeetlike aand van smul-lekker kos, heerlike musiek en die samesyn van familie en vriende. Lara en Hendré, dit was ‘n absolute fees om deel te kon wees van julle troue, dankie ook vir julle gasvryheid ons het so welkom gevoel! Hoop julle geniet die kiekies!

Venue: La Colline

Bruid se rok: Elizabeth Stockenström

Make-up: Marietjie Hurter

Lara kan so lekker lag!

Haar rok was ongelooflik netjies gemaak met die aller mooiste detail:

Hendré het oorgeloop van vreugde toe hy Lara sien..